مه‌ڵبه‌ندی خانه‌قینی (ی.ن.ك) روونكردنه‌وه‌یه‌ك له‌سه‌ر هه‌ڵبژاردنی
حكومه‌ته ناوخۆییه‌كه‌ی پارێزگای دیاله ده‌رده‌كات‌و تیایدا
ناڕه‌زایه‌تی ده‌رده‌بڕێت له‌سه‌ر شێوازی رێكه‌وتنه‌كان.له روونكردنه‌وه‌كه‌دا، كه وێنه‌یه‌كی بۆ خه‌ندان نێردراوه ئه‌وه ده‌خرێته‌ڕوو، كه ئه‌و رێكه‌وتنه‌ی كراوه، پیلانێكی ئاشكرایه بۆ ئه‌وه‌ی پۆستی سه‌رۆكی ئه‌نجوومه‌نی دیاله به‌ر كورد نه‌كه‌وێت.
ئه‌مه‌ی خواره‌وه ده‌قی روونكردنه‌وه‌كه‌یه:
روونكردنه‌وه‌یه‌ك له مه‌ڵبه‌ندی خانه‌قینی (ی.ن.ك) له‌سه‌ر كۆبونه‌وه‌ی نوێنه‌رانی حزبی ئیسلامی و ره‌وتی سه‌در له دوای ته‌واو بوونی هه‌ڵبژاردنی ئه‌نجومه‌نی پارێزگانی عیراقه‌وه ، هه‌وڵێكی زۆر درا، لیستی كوردستانی راكێشرێته ناو كێشمه‌كێشه‌كانی لیسته‌كانی پارێزگای دیاله، مه‌ڵبه‌ندی خانه‌قین وه‌كو هه‌میشه، به له‌به‌رچاوگرتنی هه‌موو لایه‌نه‌كان و دۆخه‌كه، به‌هێمنی هه‌نگاوی ده‌نا هه‌تا وه‌كو به‌شێكی چارسه‌ری كێشه‌كان بمێنیته‌وه.
به داخه‌وه، لستی حزبی ئیسلامی –پارێزگای دیاله، كه گفتوگۆی له‌گه‌ڵ مه‌ڵبه‌ند و مه‌كته‌بی سیاسی یه‌كێتی به‌رده‌وام ده‌كرد و ده‌شیزانی دوا بڕیار لای مه‌كته‌بی سیاسیه،
كه‌چی لیستی ناوبراو، له‌پشتی په‌رده‌وه له‌گه‌ڵ نوێنه‌رانی ره‌وتی سه‌در كۆبوونه‌ته‌وه و به‌بێ بریاری ره‌سمی مه‌كته‌بی سیاسی و مه‌ڵبه‌ندی خانه‌قین، كاندیدێكی ده‌سه‌ڵات پێنه‌دراوی یه‌كێتی– یان به پۆستی جێگری پارێزگای دیاله قه‌ناعه‌ت پێكردووه و ئه‌مه‌ش پیلانێكی ئاشكرایه بۆ ئه‌وه‌ی پۆستی سه‌رۆكی ئه‌نجومه‌نی دیاله به‌ر كورد نه‌كه‌وێت.
مه‌ڵبه‌ندی خانه‌قین له كاتێكدا ناره‌زایی به‌رامبه‌ر ئه‌م بڕیاره ده‌رده‌برێت، بیری حزبی ئیسلامی ده‌خاته‌وه كه ئه‌گه‌ر خانه‌قین و مه‌ڵبه‌ندی خانه‌قین نه‌بوایه، خۆیان ده‌زانن له دووساڵی رابردوودا له‌لایه‌ن پارێزگاكه دا چیان به‌سه‌ر ده‌هات، بۆیه به‌م رونكردنه‌وه‌یه رای ده‌گه‌ێه‌نین كه وا:
یه‌كه‌م : سورین له‌سه‌ر ئه‌وه‌ی پۆستی سه‌رۆكی ئه‌نجومه‌نی پارێزگای دیاله بۆ كاندیدی ره‌سمی كورد و یه‌كێتی بێ، كه له دوا كۆبونه‌وه‌ی مه‌كته‌بی سیاسی رۆژی ( 16\6\2013 ) په‌سه‌ند كراوه
دووه‌م : داواده‌كه‌ین، به زووترین كات حزبی ئیسلامی چاو به‌و بڕیارانه دا بخشێنێته‌وه، كه به‌هیچ شێوه‌یه‌ك له‌گه‌ڵ په‌یوه‌ندی نێوان حزبی ئیسلامی عیراق و یه‌كێتی ناگونجێت
سێیه‌م : ئۆباڵی هه‌موو كێشه‌یه‌كی ئیداری و سیاسیش له قه‌زای خانه‌قین –دا ، ده‌خینه ئه‌ستۆی به‌رپرسانی حزبی ئیسلامی عیراق له پارێزگای دیاله و ئه‌ستۆی ئه‌و كه‌سه‌ی به‌ناوی یه‌كێتی له گه‌ڵیان رێكه‌وتوه.
چاوه‌روانین ، وه‌ڵامی ره‌سمی وه‌ربگرین و به زووترین كات ئه‌م كێشه‌یه چاره‌سه‌ر بكرێت.
له‌گه‌ڵ رێزماندا
مه‌ڵبه‌ندی 8ی رێكخستنی
خانه‌قینی یه‌كێتی نیشتمانی كوردستان 19\6\2013
سۆران كه‌ریم
