سەرلەبەیانی ئەمڕۆ 20-12 لە نەخۆشخانەی (مدینه الطب) لە شاری بەغدا، بە چاودێری تیمی پزیشكی تایبەت، مام جەلال سەرۆك كۆماری عیراق بەمەبەستی چارەسەر بەرەو ئەڵمانیا كەوتەڕێ.لە پەیامێكیشدا نوسینگەی سەرۆكایەتی كۆمار سوپاسی وەزارەتی تەندروستی و بەڕێوەبەرایەتی و كاردانی نەخۆشخانەی (مدینه الطب) و تیمی پزیشكی تایبەت و سەرجەم ئەوانەی هەوڵیاندا كە فەخامەتی سەرۆك كۆمار قۆناغی مەترسی تێبپەڕێنێت.
هەروەك سوپاسی سەركردەی وڵاتان و سەرجەم لایەن و كەسایەتییانە دەكەین كە لەڕێگەی نوێنەر، نامە، پەیوەندی تەلەفۆنیەوە هەواڵی تەندروستی سەرۆك تاڵەبانی- یان پرسیوە.
ئەمەش دەقی پەیامەكەیە:
پشتیوان بە یەزدانی مەزن و لە نێو خۆشەویستی گەلە مەزنەكەیدا سەرلەبەیانی ئەمڕۆ پێنج شەممە 20-12-2012 سەرۆك مام جەلال تاڵەبانی نەخۆشخانەی (مدینه الطب) ی شاری بەغداد بەجێهێشت و لە ژێر چاودێری تیمێكی پزیشكی پسپۆڕدا بەرەو كۆماری ئەڵمانیای فیدڕاڵ بەڕێكەوت.
ئەویش دوای ئەوەی بە هەوڵ و كۆششی زۆری تیمێكی پزیشكی عێراقی پسپۆڕ باری تەندروستی بەڕێزیان رووی لە چاك بوون كرد.
تیمەكەش پرس و رای بەو تیمە پزیشكییانە كرد كە لە دەرەوە هاتبوون بە جۆرێك كە چارەسەرەكان هەلومەرجێكی گونجاو و لەباری رەخساند بۆئەوەی سەرۆك كۆمار ببرێت بۆ دەرەوەی وڵات بۆ بەدواداچوونی چارەسەرەكانی لە ئەڵمانیا و چاكبوونەوەی بە تەواوی.
بەم بۆنەیەوە نوسینگەی سەرۆك كۆمار سوپاسی زۆری پێشكەشدەكات بە وەزارەتی تەندروستی و ئیدارە و كادیرانی (مدینه الطب) و تیمە پسپۆڕەكە كە هەوڵ و كۆششی زۆر و چڕوپڕیان دا لەپێناو تێپەڕاندنی ئەو قۆناغە دژوارەی كە روبەڕووی تەندروستی بەڕێز سەرۆك كۆمار بووەوە، هاوكات سوپاس و پێزانینی زۆر پێشكەشدەكەین بە سەركردە عەرەبی و بیانییەكان كە بە راستەو خۆ یان لەڕێی نوێنەرو باڵیۆزەكانیانەوە بە گیانی خۆشەویستی و برایەتی و دۆستایەتی لە هەواڵی تەندروستی سەرۆك كۆماریان پرسی و هەست و سۆز و پەرۆشی خۆیان نیشانداو نزا و پاڕانەوەیان بۆ چاكبوونەوەی سەرۆك تاڵەبانی بێ ئەندازە و بێ سنور بوو، لە خوای گەورە دەپاڕێینەوە خێرو خۆشی و ئاشتییان بەسەردا ببارێنێت.
سوپاسی یەكجار مەزنی نوسینگەی سەرۆك كۆمار بۆ هەموو سەركردەكانی وڵات و مەرجەعیەتە مەزنەكانی و كەسایەتییە (سیاسی، ئایینی، كلتوری، میدیایی، كۆمەڵایەتی، سەربازیی، پێشمەرگە و ئاسایشەكان) كە بەردەوام لە گەڵماندا بوون و ئەركیان كێشاو بە پەرۆشەوە دەستی نزاو پاڕانەوەیان بەرزدەكردەوە لەپێناو سەلامەتی سەرۆك و چاكبوونەوەیدا. ئەو هەستی خۆشەویستییەی كە لە دڵ و دەروونی عیراقییەكاندا بە هەموو پێكهاتەو چین و توێژەكانییەوە نیشاندراو نزاو پاڕانەوەیان بۆ پەروەردگار بەردەوام بوو لەپێناو پاراستنی سەرۆك كۆمار و بە زوویی چاكبوونەوەی وەك مەدالیایەكی شانازی دەمێنێتەوەو شایستەی سوپاسی زۆرە، شانازی عیراقییەكانیش دووپاتدەكاتەوە بە سەرۆك تاڵەبانی.
لە پەروەدگار دەپاڕێینەوە هەمووان بپارێزێت و فەخامەتی سەرۆك (مام جەلال) مان بە ساغ و سەلامەتی بۆ بگەڕێنێتەوە.
