به‌پێی
هه‌واڵێكی ڕۆژنامه‌ی (یه‌نی ئیوزگیور پۆڵه‌تیكا) له مانگی ڕابردوو، دز
چووه‌ته سه‌ر ماڵی ئه‌و لێكۆڵه‌ره‌ی لێكۆڵینه‌وه له‌دۆسیه‌ی
(تێرۆركردنی) سێ ژنه سیاسه‌تمه‌داره‌كه‌ی په‌كه‌كه ده‌كات له‌پاریس‌و
ته‌نها ئه‌و كۆمپیوته‌ره‌ی دزیوه كه دۆسیه نهێنیه‌كانی (تیرۆری) ئه‌و
سێ ژنه‌ی تێدابووه.
ئاژانسی
فرات نیوزی نزیك له‌په‌كه‌كه، هه‌واڵێكی ڕۆژنامه‌ی (یه‌نی ئیوزگیور
پۆڵه‌تیكا)ی گواستووه‌ته‌وه‌و، له‌هه‌واڵه‌كه‌دا هاتووه: دز چووه‌ته
سه‌ر ماڵی ئه‌و لێكۆڵه‌ره‌ی كه ماوه‌ی ساڵێكه دۆسیه‌ی لێكۆڵینه‌وه‌ی
سێ ژنه سیاسه‌تمه‌داره‌كه‌ی په‌كه‌كه‌ی له‌ئه‌ستۆدا بووه‌و دزه‌كان
ته‌نها ئه‌و كۆمپیوته‌ره‌ی دزیوه كه دۆسیه نهێنیه‌كانی (تیرۆری) ئه‌و
سێ ژنه‌ی تێدابووه.
(ساكینه
جانسز، فیدان دۆغان، له‌یلا شایله‌مه‌ز) ئه‌و سێ ژنه سیاسه‌تمه‌داره‌ی
پارتی كرێكارانی كوردستان (په‌كه‌كه) بوون كه‌له 9 ی كانوونی
دووه‌می 2013 له‌نوسینگه‌ی زانیاری كورد، له‌پاریسی پایته‌ختی فه‌ره‌نسا
له‌ئه‌نجامی هێرشێكی (تێرۆریستیدا) شه‌هیدكران.
به‌پێی،
هه‌واڵه‌كه: "دزه‌كان بێ ئه‌وه‌ی هیچ زیانێك به‌ماڵه‌كه بگه‌یه‌نن یان
جێ په‌نجه‌یان به‌جێ بمێنێت، چونه‌ته ماڵی لێكۆڵه‌ره‌كه‌و كۆمپیوته‌ره
تایبه‌ته‌كه‌ی لێكۆڵه‌ره‌كه‌یان بردووه كه هه‌موو دۆسیه‌كانی
لێكۆڵینه‌وه‌ی تێدابووه".
ماوه‌یه‌ك
به‌ر له‌ئێستاش بنه‌ماڵه‌ی هه‌ر سێ ژنه‌كه داموده‌زگا به‌رپرسه‌كانی
فه‌ڕه‌نسایان به‌سه‌ر كردبووه‌وه بۆ ئه‌وه‌ی بزانن ئایا لێكۆڵینه‌وه‌ی
دادگا له‌باره‌ی دۆسیه‌كه‌وه به‌كوێ گه‌یشتوه، به‌ڵام دادگا
داواكه‌یانی ره‌تكردبووه.
