ئه‌مڕۆ 17-10-2013 خوشك و
برایانی كوردی شه‌به‌ك له یه‌كێك له گه‌ڕه‌كه‌كانی شاری موسڵ كرانه
ئامانجی تیرۆریستان و له رێی ئۆتۆمبیلێكی مینڕێژكراو هێرشی
تیرۆریستانه‌یان كرایه‌سه‌ر و له ئه‌نجامیشدا ده‌یان شه‌هید و برینداری
لێكه‌وته‌وه. به‌م بۆنه‌یه‌وه مه‌كته‌بی سیاسی یه‌كێتیی نیشتمانیی
كوردستان پرسه و سه‌ره‌خۆشی و هاوخه‌می ئاراسته‌ی كه‌س و كاری قوربانیان
ئه‌كات و سڵاو بۆ گیانی پاكی شه‌هیده‌كان ئه‌نێرین و هیوای هه‌رچی زوو
چاكبوونه‌وه‌ش بۆ بریندارانی ئه‌م كرده‌وه تیرۆریستیه ئه‌خوازین.ئه‌مجۆره هێرشه ئامانجدارانه بۆ سه‌ر خوشك و برا كورده‌كانمان له‌و شاره پلانێكی داڕێژراوه و پێویستیشه هه‌رچی زووه لایه‌نه ئه‌منی و ئیداریه په‌یوه‌ندیداره‌كان به ئه‌ركی خۆیان هه‌ڵسن و كاری جدی بكه‌ن بۆ دۆزینه‌وه و به سزاگه‌یاندنی ئه‌و گروپ و تاقمانه‌ی كه كاری له‌م شێوه‌یه ئه‌نجام ئه‌ده‌ن و رێگه‌ش بگرن له دووباره بوونه‌وه‌ی رووداوی له‌م جۆره.
جارێكی تر ئه‌و كرده‌وه نامرۆڤانه‌یه به توندی ئیدانه ئه‌كه‌ین و هیوادارین ژیانی هاووڵاتیانمان له سه‌رتاسه‌ری وڵات پارێزراو بێت و دوور بن له هه‌ر هه‌ڕه‌شه‌یه‌كی تیرۆریستان.
هیواخوازیشین خوای گه‌وره گیانی شه‌هیدانی ئه‌م كرده‌وه تیرۆریستییه به به‌هه‌شتی به‌رینی خۆی شاد بكات و شیفای به‌په‌له‌ی بریندارانیش بدات و به‌زووترین كات به‌ته‌ندروستیه‌كی باش بگه‌ڕێنه‌وه نێو كه‌س و كاریان.
مه‌كته‌بی سیاسی
یه‌كێتی نیشتمانی كوردستان
17/10/2013
