لەخانەقین رێوڕەسمی چلەی
ماتەمینی شەهیدانی هەڵبژاردن بەڕێوەچوو، لەو رێوڕەسمەدا كە دوێنێ 2014/6/5
رێكخرابوو، مەلا بەختیار لێپرسراوی دەستەی كارگێڕی مەكتەبی سیاسی و قوباد
تاڵەبانی كاندیدی راسپێردراوی جێگری سەرۆكی حكومەتی هەرێم بۆ پێكهێنانی
حكومەت ژمارەیەك لەئەندامانی مەكتەبی سیاسی و سەركردایەتیی ی.ن.ك و
نوێنەرانی لایەنە سیاسییەكان و ژمارەیەك لەپەرلەمانتاران و وەزیری كاروباری
شەهیدان و ئەنفالكراوان و پارێزگاری دیالەو بەرپرسانی حكومی و كەسوكاری
شەهیدانی خانەقین و بریندارانی كردەوە تیرۆریستییەكەی 29/4 ی خانەقین و
جەماوەرێكی بەرچاو ئامادەیبوون.شێركۆ میروەیس لێپرسراوی مەڵبەندی خانەقینی ی.ن.ك سوپاسی كەسوكاری شەهیدان و بریندارانی كردەوە تیرۆریستییەكەی خانەقینی كرد كە بەگەرموگوڕییەوە بەشداریی دەنگدانیان كرد، وتیشی: یەكێتی لە 39 ساڵەی خەباتیدا، هەموو رۆژێكی هەر خوێن بەخشین و تێكۆشان بووە، راشیگەیاند: تۆڵەی خوێنی شەهیدەكانمان داوەتە دەستی یاسا، داواشیكرد تاوانباران بەسزای خۆیان بگەیەنرێن.
بەسزاگەیاندنی تاوانباران
دواتر مەلا بەختیار لێپرسراوی دەستەی كارگێڕی مەكتەبی سیاسی وتاری مەكتەبی سیاسی پێشكەشكردو تەئكیدی لەروبەڕووبوونەوەی گروپە تیرۆریستییەكان و بەسزاگەیاندنی تاوانبارانی ئەو كردەوە تیرۆریستییەكەو خزمەتكردنی كەسوكاری شەهیدان كردەوە، سوپاسی هێزەكانی ئاسایشی گەرمیان و هێزەكانی دژە تیرۆری كرد كە توانیان لەماوەیەكی كەمدا ئەنجامدەرانی ئەو كردەوە تیرۆریستییە بدۆزنەوەو دەستگیریان بكەن، راشیگەیاند: كارەساتەكە جەرگ بڕ بوو، جەرگ بڕ بەمانای وشە، بەمانای ئازارەكانی جەرگ بڕ، بەمانای راچەڵەكاندنی شارێك، هێشتا برینێكی كەمی تەعریب و تەرحیل و تەبعیس، ئاوارەیی، هێشتا برینێكی كەمی ئەو قوربانیانەمان ساڕێژ نەكردووە.
وتیشی: دەبێت دەستوورو مادەی 140 جێبەجێ بكرێن، تا ئێستا یەك ناحیە، نەخێر یەك گوند نەگەڕاوەتەوە سەر هەرێمی كوردستان، ناحیەی واهەیە 100%ی دانیشتوانەكەی كوردن، شارەوانی واهەیە بڕیاریداوە لەسەر كوردستان بێت، بەڵگەتان ئەوێت هەڵبژاردن بەڵگەیەكی گەورەیە، ئەوە كەركوك، خانەقین، شەنگار، شێخان و ناوچەكانی دەوروبەریان بڕیاریانداوە، هەموو راپرسییەك لە 80% بۆ 85% ی قبوڵە، تەنها هەڵبژاردن بەیاسا پەسەند دەكرێت، لەكەركوك كورد 8كورسی هەیە، عەرەب و توركمان 4 كورسیان هەیە، خانەقین لە 67 هەزار دەنگ بابزانین كورد چەند دەنگی هێناوە، هێزە عەرەبییەكان چەند دەنگیان هێناوە، راشیگەیاند: سنوری ئێمە تا حەمرینە، لەیەك بست خاكی خۆمان خۆش نابین.
وتیشی: گەر دەستور جێبەجێنەكەن، ئەوە ئێمەی كورد ئەوكاتە بڕیاری چارەنووسی خۆمان دەدەین.
جێبەجێكردنی مادەی 140
لەبەشێكی وتەكانیدا مەلا بەختیار داوای لە رەوت و حزبە شیعی و سوننییەكان كرد دەسبەرداری خانەقین بن و خزمەتی ناوچەكانی خۆیان بكەن، چونكە دەرئەنجامی هەڵبژاردنەكانی خانەقین، سەلماندیانەوە كورد لەدەرەوەی ئینتیمای مەزهەبی، دەنگ بەكوردستان دەدات و خۆی بەكوردستانیی دەزانێت، دووپاتیشیكردەوە: ئەوپەڕی ساڵێكی دیكە گەلی كورد چاوەڕوانی جێبەجێكردنی مادەی 140 دەكات.
راشیگەیاند: گەلی كورد هەوڵی بەدەستهێنانی مافە دەستوورییەكانی دەدات و حكومەتی بەغدا ناتوانێت بە پاساوی ئەو دەستوورەی كە جێبەجێی ناكات، رێگریمان لێبكات.
ئەولەویەت بۆ پرسە نەتەوایەتییەكانە
هەروەها تەئكیدی لەیەكڕیزیی و یەكهەڵوێستی لایەنە سیاسییەكانی كوردستان كردەوەو رایگەیاند: لەگفتوگۆكاندا بۆ پێكهێنانی حكومەتی ئایندەی عیراق ئەولەویەت بۆ پرسە نەتەوایەتی و مافە دەستوورییەكانی گەلی كورد دەبێت و لەگەڵ ئەو لایەنە گفتوگۆ دەكەین كە زۆرینە بۆ پێكهێنانی حكومەت مسۆگەر بكات.
كۆبوونەوە لەگەڵ كەسوكاری شەهیدان
هەردوێنێ لەخانەقین، مەلا بەختیار لێپرسراوی دەستەی كارگێڕی بەئامادەبوونی قوباد تاڵەبانی و شێركۆ میروەیس و مامۆستا موحسین عەلی ئەكبەر ئەندامی ئەنجومەنی باڵای مەكتەبی رێكخستن و مامۆستا ئارام ئەحمەد، لەگەڵ كەسوكاری شەهیدەكان كۆبۆنەوە.
لێپرسراوی مەڵبەندی خانەقین وتی: وەك یەكێتی خۆمان بەخاوەنی شەهیدەكان دەزانین، پاشان مەلا بەختیار دووبارە هاوخەمی خۆی و یەكێتی ئاڕاستەی كەسوكاری شەهیدەكان كردو وتیشی: ئەم خەم و ئازارەی كەسوكاری شەهیدەكان، خەم و ئازاری هەموو یەكێتییەكانیشەو دڵنیاشتان دەكەمەوە ئەو خەم و ئازارە بۆ خانەقین و بۆ ئایندەی خانەقین دەبێتە مایەی سەربەرزی، راشیگەیاند: ئەگەر ئێوە كەسوكارو خانەوادەی یەكەمی شەهیدەكان بن، ئەوا یەكێتی خانەوادەی دووەمی شەهیدەكانە، راشیگەیاند: درێغی ناكەین لەخزمەتكردنی كەسوكاری شەهیدەكان.
سامان یاروەیس - خانەقین
