مه‌كته‌بی سیاسی یه‌كێتیی
نیشتمانیی كوردستان به‌بۆنه‌ی 39ـه‌مین ساڵیادی دامه‌زراندنی
یه‌كێتییه‌كه‌ی دوێنێ و ئه‌مڕۆ و دواڕۆژه‌وه به‌یاننامه‌یه‌ك
بڵاوده‌كاته‌وه.له به‌شێكی به‌یاننامه‌كه‌دا هاتووه، به‌سڵاوێكی گه‌رمه‌وه ئه‌م یاده مه‌زنه‌تان لێ پیرۆز بێت و وه‌ك هه‌میشه یادی سه‌روه‌ری و سه‌رفرازی بێت بۆ گه‌له‌كه‌مان، یادێكی نیشتمانیی و نه‌ته‌وه‌یی و دیموكراسیی بێت بۆ هه‌موو كوردستانییان كه یه‌كێتی و شۆڕشه نوێیه‌كه‌ی بۆ ئه‌وان و به‌وان هاته كۆڕی خه‌باته‌وه‌و مێژووی 1-6-1975 ی كرده ئه‌زموونێكی نوێی حزبایه‌تی ناو هه‌ناوی بزووتنه‌وه‌ی رزگاریخوازیی و رۆژی 1-6-1976یشی كرده وێستگه‌ی شۆڕشێكی نوێی درێژخایانی پشتبه‌ستوو به رێبازی پێشكه‌وتنخوازی سیاسیی و فیكری و به ئیراده‌ی شۆڕشگێڕی میللـه‌ت كه سه‌رچاوه‌ی هێزی په‌نهانی سه‌ركه‌وتن و درێژه‌دانی خه‌بات بوو
ده‌قی به‌یاننامه‌كه‌ی مه‌كته‌بی سیاسی یه‌كێتیی نیشتمانیی كوردستان:
هه‌ڤاڵان، ئه‌ندامان و لایه‌نگرانی یه‌كێتیی نیشتمانیی كوردستان، پێناوانی رێبازی شۆڕشی نوێی گه‌له‌كه‌مان كه ئه‌مڕۆ یادی دامه‌زراندن و به‌رپابوونی هه‌ردووكیان ده‌كه‌ینه‌وه.
به‌سڵاوێكی گه‌رمه‌وه ئه‌م یاده مه‌زنه‌تان لێ پیرۆز بێت و وه‌ك هه‌میشه یادی سه‌روه‌ری و سه‌رفرازی بێت بۆ گه‌له‌كه‌مان، یادێكی نیشتمانیی و نه‌ته‌وه‌یی و دیموكراسیی بێت بۆ هه‌موو كوردستانییان كه یه‌كێتی و شۆڕشه نوێیه‌كه‌ی بۆ ئه‌وان و به‌وان هاته كۆڕی خه‌باته‌وه‌و مێژووی 1-6-1975 ی كرده ئه‌زموونێكی نوێی حزبایه‌تی ناو هه‌ناوی بزووتنه‌وه‌ی رزگاریخوازیی و رۆژی 1-6-1976یشی كرده وێستگه‌ی شۆڕشێكی نوێی درێژخایانی پشتبه‌ستوو به رێبازی پێشكه‌وتنخوازی سیاسیی و فیكری و به ئیراده‌ی شۆڕشگێڕی میللـه‌ت كه سه‌رچاوه‌ی هێزی په‌نهانی سه‌ركه‌وتن و درێژه‌دانی خه‌بات بوو.
ئه‌م یاده‌ی یه‌كێتی و شۆڕشیش به هه‌ل ده‌زانین، دیسان سڵاوی بێ پایان بۆ ده‌نگ ده‌رانی یه‌كێتی بنێرین، ئه‌و ده‌نگده‌رانه‌ی ئارام ئارام جۆشیان خوارد و له 30/ی نیساندا كوردستانیان هه‌ژاندو نه‌یارانیان تاساند!
هه‌ڤاڵانی یه‌كێتیی
یه‌كێتیی به‌م خه‌سڵه‌ته نه‌ته‌وه‌یی و دیموكرات و پێشكه‌وتنخوازه‌ی به‌رنامه‌ی نیشتمانیی و كۆمه‌ڵایه‌تی خۆیه‌وه، به‌و ئیراده پۆڵاینه‌ی ده‌ستپێكی خه‌باتی نوێوه، توانی به‌سه‌ر دژواری قۆتاغی نه‌خوازراوی دوای نسكۆدا زاڵ بێت، له سه‌روه‌ختێكدا رژێمی به‌عس، به داگیركردنی كوردستان بێباك بووبوو، به په‌یوه‌ندییه ئیقلیمی و نێو ده‌وڵه‌تییه‌كانی كه له‌ناو جوغزی شه‌ڕی ساردی زلهێزه‌كاندا بۆی ره‌خسابوو، كه‌شوفشی به‌سه‌ر گه‌لی كوردستان و تێكرای بزووتنه‌وه‌ی دیموكراتیی عیراقدا ده‌كردو موقه‌ده‌راتی ئابووری و مرۆیی وڵاته‌كه‌ی بۆ زاڵبوونی عه‌سكه‌رتاری و جه‌نگ خسبووه‌گه‌ڕ، یه‌كێتیی به ته‌گبیری شۆڕشگێری و خوێندنه‌وه‌ی دروستی واقیعه‌كه بانگه‌وازی شۆڕشی داو هێزی كوردایه‌تی پێشكه‌وتنخوازو وزه وره‌ی كۆمه‌ڵانی خه‌ڵكی كوردستانی بۆ به‌رخۆدان و به‌ره‌نگاری سازدا، مه‌فره‌زه سه‌ره‌تاییه‌كانی خه‌باتی به گژ ته‌عریب و ته‌رحیل و ته‌بعیسدا كرده‌وه‌و ته‌سلیمی واقیعی داگیركاریی به‌عس و شه‌وه‌زه‌نگی فاشییه‌كان نه‌بوو، بگره به‌م ده‌ستپێشخه‌رییه‌شه‌وه له هه‌ڵگیرسانه‌وه‌ی شۆڕش و هه‌ڵكردنی ئاڵای موقاوه‌مه‌تندا، یه‌كێتیی نیشتمانیی كوردستان هه‌رگیز مه‌به‌ستی نه‌بوو مه‌یدانی نه‌به‌ردی بۆ خۆی پاوان بكات و له دیدێكی راست و دروستی دیموكراسی و كوردستانییه‌وه، هه‌میشه كۆششی بۆ یه‌كخستنی تواناكانی خه‌بات له‌دژی رژێمی سه‌ددام ده‌كرد، هه‌ر له سروشتی پێكهاتنی خۆیه‌وه وه‌ك هێزێكی نیمچه به‌ره‌یی و ئینجا بانگه‌وازیی كوردایه‌تی له دامه‌زراندنییه‌وه بۆ كاری هاوبه‌ش تا ئاشتبوونه‌وه‌ی گشتیی و دامه‌زراندنی به‌ره‌ی كوردستانیی، به‌م نه‌فه‌سه شۆڕشگێرییه‌وه كاری كردو هه‌ر به‌و روانینه ستراتیژییه‌شه‌وه یه‌كێتی ریزه‌كانی گه‌لی وه‌ك پێشمه‌رجی سه‌ركه‌وتنی خه‌بات زانی و به‌و روحیه‌ته‌شه‌وه رێبه‌رایه‌تی نه‌خشه‌كێشان و به‌رپاكردنی راپه‌رینی جه‌ماوه‌ریی كرد.
ئیراده‌ی راپه‌رینخوازی یه‌كێتیی و دروستی هه‌ڵسه‌نگاندنی بۆ ته‌نگوچه‌ڵه‌مه‌كانی رژێمی سه‌ددام كه سیاسه‌ته چه‌وت و فراوانخوازییه فاشسته‌كانی به‌ره‌و لاته‌ریك كه‌وتن و دارووخان ده‌یبرد، له‌گه‌ڵ ئیراده‌ی میللـیی گه‌لی كوردستان ئاوێته‌ی یه‌كبوون و بۆ یه‌كه‌مینجار له مێژووی شۆڕشه‌كانی كوردستاندا، شۆڕشی درێژخایان گه‌یشته وێستگه‌ی راپه‌ڕین و... كوردستانیی ئازادی كرده خه‌ڵاتی ره‌نج و تێكۆشانی ئازادیخوازان و رێگای بۆ ئه‌زموونی دیموكراتیی دوو ده‌یه‌ی میللـه‌ته‌كه‌مان كردووه.
كۆمه‌ڵانی خه‌ڵكی كوردستان
خوشك و برایان
بۆ یه‌كێتیی شانازییه كه به‌ری خه‌باتی بزووتنه‌وه‌ی رزگاریخوازی گه‌له‌كه‌مان له شۆڕشی نوێدا گوڵی ئازادی و رێگای دیموكراتی و هه‌ڵبژاردن و گوڵی په‌رله‌مان و حكومه‌تی هه‌رێم بگرێت، بۆ یه‌كێتیی سه‌روه‌رییه، نه‌ك منه‌ت، كه قوربانیی و ره‌نجی بۆ مافی چاره‌نووس داو سه‌ره‌نجام كوردستانی له قه‌ده‌ری نه‌زۆكی ئۆتۆنۆمی و ئۆتۆنوۆمی راسته‌قینه رزگاركرد، نه‌خشه‌رێی فیدراڵی كرده دروشمی یه‌كه‌مین هه‌ڵبژاردن له مایسی 1992 و یه‌كه‌مین پلیكانه‌ی سه‌ركه‌وتن به‌ره‌و مافی ره‌واو ڕه‌های چاره‌نووسی یه‌كجاریی نه‌ته‌وه‌ی كورد، یه‌كێتیی له‌م وێستگه‌یشدا، وه‌ك وێستگه‌كانی خۆڕاگری زینداییانی (رێبازی كه‌م ژیان و كه‌ڵ ژیان)، وه‌ك وێستگه‌ی نه‌به‌ردییه‌كانی پێشمه‌رگه‌و نه‌به‌ردی به پێوه‌شه‌هیدبوونی فه‌رمانده‌و پێشمه‌رگه‌كانی، خوێن و قوربانی دا تا ئه‌زموونی حكومڕانی كوردستانیی بمێنێ و له خه‌می پیلانی ناوخۆو هه‌رێمیی بڕه‌خسێ و وه‌ك نموونه‌یه‌كی سه‌ركه‌وتوویی ئه‌ركه‌كانی دیموكراتیی پایه‌كانی خۆی دابكوتێت، ئه‌مه‌ش له ناوچه‌یه‌كدا كه كه‌یفی به ئازادی و دیموكراتیی و كه‌یفی به‌هیچ سه‌ر بڵندكردنه‌وه‌یه‌كی كورد نایه‌ت، نرخێكی گه‌وره‌ی ده‌ویست و یه‌كێتی ئه‌م نرخه‌شی به‌سه‌خاوه‌ته‌وه‌دا.
هه‌ڤاڵان و دۆستانی یه‌كێتی
یه‌كێتیی به سه‌برێكی شۆڕشگێری زۆره‌وه كاروانی خه‌باتی تا قۆناغی روخانی رژێمه‌كه‌ی سه‌ددام برد، به‌و قۆناغه‌ش گه‌له‌كه‌مان نه‌ك هه‌ر له په‌ژاره‌ی ئه‌نفال و كیمیاباران رزگاری بوو، به‌ڵكو له دڵه‌راوكێی به هه‌ده‌ر چوونی ده‌سكه‌وته‌كانی راپه‌رین و حكومه‌تی هه‌رێم و په‌رله‌مانیش رزگاری بوو، كه هه‌میشه تا به‌عس مابوو له به‌رده‌م مه‌ترسی فه‌وتان و نه‌ماندا بوو، به كه‌وتنی رژێمی ته‌عریب و سێداره‌ش، یه‌كێتیی سه‌رمه‌شقی چه‌سپاندنی فیدرالی بوو له ده‌ستووری دیموكراتی عیراقدا، بگره له‌ڕێی خه‌باتی هاوبه‌شی كوردستانییه‌وه، رابه‌ری شۆڕشه نوێیه‌كه‌و سكرتێری گشتی ، هه‌ڤاڵ مام جه‌لال، له ترۆپكی ده‌سه‌ڵاتی ده‌ستووری ئه‌م وڵاته وه‌ك یه‌كه‌مین سه‌ركۆماری هه‌ڵبژێردراو، یه‌كه‌مین سه‌ركۆماری كورد بووه شاهیدی قۆناغی نوێی سیاسیی له كوردستان و عیراقدا، قۆناغێك ده‌ربڕێكی چۆنایه‌تی بوو له گۆڕینی پێگه‌و سه‌نگی كورد له هاوكێشه‌ی په‌یوه‌یندیی گه‌لانی عیراقدا، چونكه ئه‌گه‌ر جاران مافه‌كانی كورد له ئۆتۆنۆمیه‌كی سنوورداری موفاوه‌زات له‌گه‌ڵ رژێمێكی نادیموكراتدا ده‌گه‌یشته دووڕیانی پێشێلكردن و حاشالێكردنی كوردستانێتی ناوچه دابڕاوه‌كان، ئه‌وا ده‌ستووریی یه‌كێتیی ئاره‌زوومه‌ندانه‌ی عیراق جێی فیدراڵ و مادده‌ی 140 و شه‌راكه‌تی یه‌كسانی كرده‌وه هه‌ڵبه‌ته، حكومه‌تی عێڕاقیش، وریا ده‌كه‌ینه‌وه كه چیكه سیاسه‌تی كات به‌فیرَۆدان له جێبه‌جێكردنی ماده‌ی 140 قبوڵ ناكرێ، كاتی یه‌كلاكردنه‌وه‌ی بڕیار نزیكبۆته‌وه عێراق یان جێبه‌جێیان ده‌كات، وه‌ك له دروشمی سه‌ره‌كی یه‌كێتیی بۆ هه‌ڵبژاردنی 30ی نیسانی 2014 دا هاتبوو، یان گه‌له‌كه‌مان رێی مافی چاره‌نووس ئاوه‌دانتر ده‌كاته‌وه.
هاووڵاتیانی كوردستان،
یه‌كێتی به‌م تۆماره پڕ سه‌روه‌رییه‌وه له خه‌باتی شۆڕشگێڕی و پێشمه‌رگانه، خه‌باتی جه‌ماوه‌ری و سیاسیی، خه‌باتی دیموكراتی و مه‌ده‌نی بۆ چه‌سپاندنی مافه دیموكراته‌كانی تاك وتوێژو چینه‌كانی كورده‌واری، بۆ یه‌كسانی ژنان و دابینكردنی كه‌شوهه‌وای خه‌باتی سه‌ندیكایی و دادپه‌روه‌ری كۆمه‌ڵایه‌تی، خه‌باتی حكومڕانی بۆ ئاوه‌دانی و خۆشگوزه‌رانی، به‌و رابردووه پر ده‌سكه‌وتانه‌شه‌وه پێی وا نییه هه‌موو شتێك ته‌واوه‌و ئه‌زموونه‌كه‌مان بێ كه‌موكورییه، به‌ڵكو له گه‌لێك قۆناغدا ره‌خنه‌ی له ئه‌زموونه‌كه‌و كه‌موكوڕییه‌كانی گرتووه، پێش هه‌موو شتێكیش ره‌خنه‌ی له به‌شی خۆی له كه‌موكوڕییه‌كان گرتووه‌و باجی ئه‌و كه‌شوهه‌وا دیموكراسییه‌شی داوه كه بۆ ئازادی ره‌خنه ره‌خساندویه‌تی و لێشی په‌شیمان نییه، به‌ڵكو به به‌شێك له قوربانی شایسته‌و سه‌روه‌ریی خۆی ده‌زانێت، هیچ ئیرهابێكی فیكری و سیاسییش له‌دژی یه‌كێتییه‌كان وای لێنه‌كردووه‌و وای لێناكات له‌و بژارده دیموكراسییه‌ی خۆی په‌شیمان ببێته‌وه، به‌ڵكو داكۆكیشی لێده‌كات چونكه یه‌كێتی هه‌رگیز له بیروباوه‌ڕ په‌شیمان نابێته‌وه
یه‌كێتیی ئه‌و كه‌موكورییانه‌ی له بواری ئه‌زموونه‌كه‌دا هه‌یه ده‌یبینێ و دیارترین كه‌موكوریش ئه‌وه بوو نه حزبه‌كانی حوكمڕان و نه حزبه‌كانی جارانی ئۆپۆزسیۆنیش نه‌یانتوانی خاڵی هاوبه‌ش و ناوكۆیی بۆ ئیداره‌دانی قۆناغی رابردوو بگرنه‌به‌ر، هه‌رچه‌نده دواجار به به‌شداریی هه‌موو لایه‌نه‌كان، له‌م كابینه‌ی به‌رێوه‌یه ڕاستی ئه‌و تێزه‌ی یه‌كێتیی ده‌ركه‌وته‌وه كه حزب له بنچینه‌دا بۆ ده‌سه‌ڵات دروستده‌بێت نه‌ك بۆ مانه‌وه‌ی هه‌تاسه‌ر له ئۆپۆزسیۆندا، چونكه له ده‌سه‌ڵاتدا به‌رنامه‌كان له مه‌حه‌كی ڕاستی و دروستی ده‌درێن، ده‌ركه‌وت گۆڕینی ئاڕاسته‌ی ڕه‌خنه له كه‌موكوڕی ده‌سه‌ڵات بۆ روخاندنی ده‌سه‌ڵاتی دیموكراسی هه‌ڵه‌یه‌كی ستراتیژی چه‌واشه‌كارانه بوو، و هیچی دیكه!
یه‌كێتیی خۆشحاڵه كه نه‌خشه‌رێگای حكومه‌تی بنكه فراوان و یه‌كڕیزی نیشتمانیی بۆته رێگای هه‌مووان و به‌ڵێنی به جه‌ماوه‌ری كوردستانیش داوه كه له‌م رێگایه درێغی له به‌شداری كارا له حكومه‌ت ناكات و به پاراستنی جیاوازی فیكری و سیاسیی خۆیه‌وه، به كارو كۆششی زۆرو به دیدی ره‌خنه‌ییه‌وه له هه‌موو قۆناغه‌كان ئاماده‌ی كرده‌و كۆششی بێوچانه، ئاماده‌ی دیالۆگه بۆ هه‌موو ئاسته‌كانی حكومڕانی: پارێزگاكان، هه‌رێم و به‌غدا له پێناو ئه‌وه‌ی یه‌كڕیزی كورد بۆ ئامانجه هاوبه‌شه‌كان بپارێزێ و ده‌سكه‌وته‌كانی گه‌لی كوردستان په‌ره پێبدات.
یه‌كێتییه سه‌ربه‌رزه‌كان،
كچان و كوڕانی رێی ئه‌م خه‌باته دوورو درێژه،
نه‌وه‌ی سێیه‌می یه‌كێتیی
ئێوه كه له‌م وێستگه تازه‌یه‌ی خه‌باتی دیموكراسیی یه‌كێتییه‌كه‌تاندا، به گیانی شۆڕشگێرانه‌ی مامه‌وه، به ئیراده‌ی پۆڵایینی پێشمه‌رگه گیان له‌سه‌ر ده‌سته‌كانی مه‌فره‌زه سه‌ره‌تاییه‌كانه‌وه، ده‌ستان دایه ده‌ستی یه‌كتری و له خه‌باتی هه‌موو نه‌وه‌كانی یه‌كێتییدا داستانی هه‌ڵسانه‌وه‌ی یه‌كێتیتان جێبه‌جێكرد، هه‌قی خۆتانه شانازی به هه‌ڤاڵێتی ئه‌م یه‌كێتییه سه‌ربه‌رزه‌وه بكه‌ن كه نزیكه‌ی چوار ده‌یه‌یه به سه‌ركرده‌وه‌و فه‌رمانده‌وه، به ئه‌ندام و لایه‌نگره‌وه قوربانی بۆ كوردو كوردستان ده‌دات و بۆته سه‌رمایه‌یه‌كی نه‌ته‌وه‌یی بۆ كوردی هه‌موو پارچه‌كان، تازه كه نه‌وه‌ی سێیه‌م له قۆناغی سیاسی نوێی ئێستادا گه‌یشت سه‌ره‌تای راپه‌ڕاندنی ئه‌ركه قورسه‌كان، یه‌كێتی ئه‌م قۆناغه‌ش ده‌باته‌سه‌ر.
هه‌موو تێكۆشه‌رانی یه‌كێتیی هه‌قی خۆیانه له‌به‌ری سه‌بری شۆڕشگێریی و دانبه‌خۆداگرتنی خۆیان بخۆن كه سه‌ره‌نجام چۆن سیاسه‌ت ئیرهابی جه‌سته‌یی چۆكی به‌یه‌كێتی دانه‌دا، له‌م هه‌لومه‌رجه‌شدا ئیرهابی سیاسی و فكری و روحی و نه‌خشه‌ڕێگای چه‌واشه‌خوازی، پوچه‌ڵكرده‌وه‌و پیلانه‌كانی تێكشكان، راستی و ره‌وایی رێبازی یه‌كێتییه‌كه‌تان ده‌ركه‌وت كه رێبازی كوردستانێتی راسته‌قینه‌ی سه‌رتاسه‌ریی، رێبازی پێشكه‌وتنخوازی سۆشیال دیموكرات و رێبازی راستكردنه‌وه‌ی هه‌ڵه‌كان و نه‌ترسان له ره‌خنه‌و له دواوای لێبوردن له گه‌له‌كه‌مانه.
یه‌كێتیی چونكه گه‌له‌كه‌مان به سه‌رچاوه‌ی وزه‌و سه‌رمایه‌ی خۆی ده‌زانێ، گه‌ل به ئاوێنه‌ی دیتنی راستییه‌كان ده‌زانێ، هه‌ر بۆیه، به‌پێی به‌رنامه‌یه‌كی نوێی هه‌ڵبژاردن، له به‌رده‌م گه‌لدا به‌ڵێنی داو پابه‌ندی به‌ڵێنی دووپاتكراوه‌ی خۆشێتی، به‌و ئیراده‌یه‌وه توانی قۆناغی شۆكی هه‌ڵبژاردنی 21ی ئه‌یلولی 2013 و ئیرهابی فیكری و سیاسیی نه‌یارانیش تێپه‌رێنێ، نه‌هێڵێت كاریگه‌ری خراپ له‌سه‌ر به‌رنامه‌ی وردو ژیرانه‌ی هه‌ڵبژاردنی 30ی نیسانی 2014 دابنێت، به‌پێچه‌وانه‌وه یه‌كێتیی شۆكی دابه‌زینی ڕێژه‌ی ده‌نگه‌كانی له (21/9/2013) به سه‌ركه‌وتنێك گۆرییه‌وه كه ئه‌وانه‌ی رملیان بۆ فه‌وتانی لێ ده‌دا سه‌رسه‌ره‌نجام ئێستا خۆیان تووشی شۆك بوون، یه‌كێتیی كه كاریگه‌ری شه‌ڕی ده‌روونی و شه‌ڕی ئیرهابیی فیكریی و سیاسیی تێپه‌ڕاند، گفتو به‌ڵێنی له‌گه‌ڵ دۆست و نه‌یار ئه‌وه‌یه كه هه‌ر یه‌كێتییه‌كه‌ی جاران بێت، كۆتری سپی و شنه‌ی بای قۆناغی ئاشتی بێت، نه شكست پاشه‌كشێی پێ ده‌كات له ویسته دیموكراتییه‌كانی و نه سه‌ركه‌وتنیش ئامانجه نه‌ته‌وه‌ییه‌كانی له‌بیرده‌باته‌وه. له هه‌ردووكیاندا پارێزه‌ریدیموكراسی و مافه‌كانی گه‌له‌كه‌مان ده‌بێت، ده‌سته‌به‌ری ئازادی و یه‌كسانی ژن و پیاو ده‌بێت
هه‌ڤاڵانی یه‌كێتیی له‌هه‌ر ئۆرگانێكی خه‌باتدا بن،
له‌م هه‌لومه‌رجه تازه‌یه‌ی هه‌ڵسانه‌وه‌ی یه‌كێتییدا، ئه‌مڕۆ زیاتر له‌هه‌ر كاتێكی تر له به‌رده‌م ئیستحاقی خۆسازدانه‌وه‌داین بۆ قۆناغی نوێی تێكۆشانی یه‌كێتیانه، ئیستحقاقی دیموكراتی و حكومڕانی و نه‌ته‌وه‌یی كه هه‌ر هه‌موویان یه‌كێتییه‌كی نوێ و به‌هێزترمان لێ ده‌خوازێت، ئێمه بۆ ئه‌و یه‌كێتییه به‌هێزه كۆنگره‌یه‌كی یه‌كێتیانه‌ی به‌هێزمان پێوسته، كۆنگره‌یه‌ك یه‌كێتیی ناو یه‌كێتیی پته‌وتر بكات و به یه‌ك به‌رنامه‌و ئاڕاسته‌وه یه‌كێتیی بۆ ئه‌ركه‌كانی داهاتوو ئاماده بكات.
ئێمه دڵنیاین هه‌لومه‌رجی گه‌شبینانه‌ی دوای هه‌ڵبژاردنی نیسانی ئه‌مساڵ ژینگه‌یه‌كی له‌بارتری خوڵقاندووه‌و به‌شێكی مه‌ترسییه‌كانی ناو یه‌كێتیی و له‌سه‌ر یه‌كێتیی ره‌واندۆته‌وه، ئومێدیشمان وایه هه‌موو یه‌كێتییه‌كان له پێناو یه‌كێتیی ناو یه‌كێتیی و بۆ ئه‌و ئامانجانه‌ی یه‌كێتیی بۆی هاته كۆڕی خه‌باته‌وه‌و خه‌ڵكی جارێكی تر متمانه‌یان پێدایه‌وه، به گیانی له خۆبردووییه‌وه كار بۆ سه‌رخستنی ئاماده‌كاری كۆنگره‌و ره‌خساندنی ژینگه‌یه‌كی له‌باری كۆنگره‌یه‌كی سه‌ركه‌وتوو شایه‌ن به مێژووی یه‌كێتی و ئێستاو ئاینده‌ی یه‌كێتی، ده‌كه‌ن.
قۆناغی نوێش بۆ یه‌كێتییه‌كان قۆناغی قوربانیدانه له پێناو گشتدا، قۆناغی قوربانیدانه به به‌رژه‌وه‌ندیی شه‌خسیی و له پێناو به‌رژه‌وه‌ندیی یه‌كێتیی ناو یه‌كێتیی و بۆ یه‌كێتییه‌ك كه گه‌له‌كه‌مان چاوه‌رێی رێبه‌رایه‌تیكردنی قۆناغی داهاتووشی لێده‌كات، كه قۆناغی دوا بڕیاری چاره‌نووس و نه‌خشه‌رێگای یه‌ك ساڵه‌ی گه‌رانه‌وه‌ی كه‌ركوك و خانه‌قین و مه‌خمورو شه‌نگال و ناوچه‌كانی تره بۆ سه‌ر هه‌رێمی كوردستان
تا هاتنه‌دی ئه‌و ئامانجه،
سڵاو له یه‌كێتیی، له یادی یه‌كێتیی و شۆڕشی نوێدا
سڵاو له رابه‌ری شۆڕشی نوێ و مامی كوردو یه‌كێتییه‌كان له‌م یاده مه‌زنه‌دا، كه چاوه‌ڕێی گه‌ڕانه‌وه‌ی هیواو ئاواتی گه‌له‌كه‌مانین
سڵاو له شه‌هیده سه‌ربه‌رزه‌كانی كوردستان، له شه‌هیدانی سه‌ركرده‌و فه‌رمانده‌و پێشمه‌رگه له ریزه‌كانی شۆڕشی نوێ و راپه‌ڕین و نه‌به‌ردییه‌كانی تردا.
سڵاو له كه‌سوكاری سه‌ربه‌رزی شه‌هیدان، له زیندانیانی سیاسیی و پێشمه‌رگه كه‌مئه‌ندامه‌كانی سه‌نگه‌رو پێشمه‌رگه‌كانی ناو سه‌نگه‌ری ئاوه‌دانی ئێستا،
سڵاو له كه‌سوكاری شه‌هیدانی هه‌ڵه‌بجه‌و ئه‌نفالكراوه‌كان
سڵاو له یه‌كێتییه‌كان،
له جه‌ماوه‌ری یه‌كێتیی و له ده‌نگده‌ری یه‌كێتیی
سڵاو له نه‌وه‌ی دوا رۆژ،
پیرۆزه یادی 39 ساڵه‌ی دامه‌زراندنی یه‌كێتییه‌كه‌ی دوێنێ و ئه‌مڕۆ و دواڕۆژ
مه‌كته‌بی سیاسی یه‌كێتیی نیشتمانیی كوردستان
