د.فوئاد مەعسوم وەك كاندیدی كورد بۆ پۆستی سەرۆك كۆمار دیاریكرا

ئەمشەو 2014/7/24 پەرلەمانتارانی كوتلە كوردستانیەكان بۆ یەكلایكردنەوەی كاندیدێك بۆ پۆستی سەرۆك كۆماری عیراق لەشاری بەغدا كۆبوونەوەو دواتریش پرۆسەی دەنگدان دەستیپێكرد بۆ هەڵبژاردنی كاندیدێكی پۆستی سەرۆكی كۆمار لەنێوان د.فوئاد مەعسوم و د.بەرهەم ساڵح-داو دواتر د.فوئاد مەعسوم بە بەدەستهێنانی 30 دەنگ وەك تاكە كاندیدی كورد بۆ پۆستی سەرۆك كۆماری عیراق دیاریكرا.

لەبارەی بەڕێوەچوونی پرۆسەی دەنگدانەكەوە، د.بێستون قادر زەنگەنە پەرلەمانتاری فراكسیۆنی یەكێتی لەئەنجومەنی نوێنەرانی عیراق، بە PUKmediaی راگەیاند: لەكۆبوونەوەكەدا 55 پەرلەمانتاری سەرجەم فراكسیۆنە كوردستانیەكان بەشداری كۆبوونەوەكەی ئەمشەو بوون بۆ یەكلایكردنەوەی كاندیدێك بۆ پۆستی سەرۆك كۆماری عیراق.

وتیشی: دواتر پرۆسەی دەنگدان بۆ یەكلایكردنەوەی كاندیدێك بۆ پۆستی سەرۆك كۆمار لەنێوان د.فوئاد مەعسوم و د.بەرهەم ساڵح دەستیپێكردو د.فوئاد 30 دەنگی بەدەستهێناو د.بەرهەم-یش 23 دەنگ و دەنگی دوو پەرلەمانتاریش بەپوچەڵ ئەژماركراو د.فوئاد مەعسوم وەك تاكە كاندیدی كوتلە كوردستانیەكان بۆ پۆستی سەرۆك كۆماری عیراق دیاریكرا.

بڕیارە سبەینێ كۆبوونەوەی ئەنجومەنی نوێنەرانی عیراق بەڕێوەبچێت و لەكۆبوونەوەكەشدا سەرۆك كۆماری عیراق هەڵببژێردرێت كە ئەو پۆستە بەپێی تەوافوقی نێوان لایەنەكان پشكی كوردەو لەنێو كوردیشدا پشكی یەكێتیەو بۆ ئەو پۆستەش د.فوئاد مەعسوم كاندیدی كورد دەبێت.

پۆلێن كردن هه‌واڵى عيراقى