به‌ره‌ی نوسرا: كورد كافرن‌ و دوژمنی ئیسلامن

گرووپه‌ چه‌ته‌كانی سه‌ر به‌ ده‌وڵه‌تی ئیسلامی عێراق‌و بیلادی شام‌و به‌ره‌ی نوسرا، 13  هاووڵاتی كوردیان له‌كۆبانێ رفاند.

فه‌رهاد ساڵح گه‌نجێكی ته‌مه‌ن  20  ساڵ،‌ به‌ ئاژانسی فرات نیوزی راگه‌یاندووە: گرووپه‌ چه‌ته‌كان  13  هاووڵاتی خه‌ڵكی كۆبانێ له‌كاتێكدا ویستوویانه‌ بڕۆنه‌ باشووری كوردستان، له‌هه‌رێمی ره‌قا رفاندووه‌.

وتیشی: تاوانی ئه‌و كه‌سانه‌ به‌ هۆی كوردبوونه‌وه‌ بووه‌ كه‌ رفێندراون‌و رووبه‌ڕووی ئه‌شكه‌نجه‌ی دڕندانه‌ی چه‌ته‌كان بوونه‌ته‌وه‌.

راشیگه‌یاند: كاتێك له‌گه‌ڵ‌ ئه‌و  12  كه‌سه‌ی تر له‌ 5 ی ئه‌یلول ده‌ڕۆنه‌ شاری كۆبانێ تا بڕۆنه‌ هه‌رێمی جزیره‌و له‌وێشه‌وه‌ بڕۆنه‌ باشووری كوردستان، له‌هه‌رێمی ره‌قا له‌لایه‌ن گرووپه‌ چه‌ته‌كانی سه‌ر به‌ ده‌وڵه‌تی ئیسلامی عێراق‌و بیلادی شام‌و به‌ره‌ی نوسرا رفێندراون.

روونیشیكرده‌وە: چه‌ته‌كان پێیان راگه‌یاندوون كورد كافرن‌و دوژمنی ئیسلامن، له‌به‌ر ئه‌وه‌ی رفاندوونیان".

ساڵح، وتویه‌تی: ئه‌و كه‌سه‌ی لێپرسینه‌وه‌ی له‌گه‌ڵ‌ كردون به‌ عه‌ره‌بی كه‌نداو قسه‌یان كردووه‌و دوو كه‌سی تریش به‌شێوه‌یه‌كی دڕنده‌ ئه‌شكه‌نجه‌یان داون‌و پێیان راگه‌یاندوون كه‌ كورد كافرن‌و  پێویسته‌ بكوژرێن.

وتیشی: چه‌ته‌كان دیمه‌نی ته‌قینه‌وه‌ی ماڵی گه‌لی گرده‌سپی‌و بنپێ خستنی ئاڵای كوردانیان نیشان داون‌و، رایانگه‌یاندووه‌: "ئه‌وه‌ سزای كافره‌كان".

پۆلێن كردن هه‌واڵى جیهانى