ئەمینداری گشتی وەزارەتی پێشمەرگەی هەرێم، رایدەگەیەنێت: هیچ هێزێكی
پێشمەرگە لە بەغدا بڵاونەكراوەتەوەو ئەوەی چەند رۆژێكە باس دەكرێت
لیوایەكی تایبەتی سەرۆكایەتی كۆمارە.فەریق جەبار یاوەر ئەمینداری گشتی وەزارەتی پێشمەرگەی هەرێم لەلێدوانێكدا بۆ ئاژانسی ئەنادۆڵی توركی، وتی: سەرۆكایەتی كۆماری عیراق خاوەنی دوو لیوای تایبەت بەخۆیەتی كە سەر بەوەزارەتی بەرگری عیراقن‌و هیچ پەیوەندییەكیان بەهێزی پێشمەرگەو وەزارەتی پێشمەرگەی هەرێمەوە نییە، لەبەر پێویستی ئێستا لیوایەكیان لە بەشێك لە ناوچەكانی بەغدا بڵاوكراونەتەوە.
جەبار یاوەر رەتكردەوە هیچ نوێنەرێكی وەزارەتی پێشمەرگە یان هەر كەسێكی سەربازی دیكە لە هەرێمەوە یاوەری وەفدی سەرۆك وەزیرانی عیراق بكات لە گەشتەكەیدا بۆ ئەمریكا.
وتیشی: وەزارەتی پێشمەرگە هیچ پشكێكی لە هیچ گرێبەستێكی چەكی عیراق نەبووەو نابێت، جگە لەوەش هەرێمی كوردستان هیچ بەشێكی لە تەقەمەنی‌و پارەو كەلوپەل‌و ئامێرو مووچەدا نییەو هەرێم بۆ خۆشی تائێستا هیچ گرێبەستێكی كڕینی چەكی لەگەڵ هیچ وڵاتێكی جیهاندا نییە.
