 |
| بەسەربەرزییەوە ئەچمە بەردەمی دادگا و پابەندم بە سەروەری یاسا |
لەسەر بڵاوكردنەوەی چەند هەواڵێك لە هەندێك لە راگەیاندنەكانەوەو، كە گوایە
بە قەرەباڵغی ئەچێتە بەردەمی دادگا، مەحمود سەنگاوی، روونكردنەوەیەك
بڵاودەكاتەوەو، دەڵێت: ئەو هەواڵە هیچ راستییەكی تێدا نییەو هەموو ئەو
دەستانەش ئەناسین كە خەریكی ئەو جۆرە ورووژاندنەن.
دەقی روونكرنەوەكە:
روونكردنەوەیەك لە (مەحمود سەنگاوی )یەوە
دەقی روونكرنەوەكە:
روونكردنەوەیەك لە (مەحمود سەنگاوی )یەوە
خەڵكیی بە شەرەفی كوردستان..
ماوەیەكە بەشێوەیەكی رێكخراو هەر لە سەرەتای تیرۆركردنی كاوە گەرمیانی جوانەمەرگەوە هەڵمەتێكی ناڕەوا لەلایەن میدیاكانەوە بەرامبەر بە یەكێتی نیشتمانی كوردستان و ئێمەش دەستیپێكردووە و بەردەوامیشە، بەبێ ئەوەی ئەم كەیسە لەلایەن دادگاوە یەكلاكرابێتەوە.ئێمە دەزانین ئەمە كارێكی بەرنامە بۆ داڕێژراوە و خەڵكانێك حوكمی پێشوەخت ئەدەن، ئەوەندەی مەبەستیان بەلاڕێدابردن و شێواندنی راستییەكانە ئەوەندە مەبەستیان گەیشتنە ئەنجام و دۆزینەوەی تاڵە دەزووەكانی ئەو تاوانەیە نییە.. لەوەش تێئەگەین كە بەلاڕێدابردن و بەكارهێنانی ئەم كەیسە بۆ مەبەستی سیاسی هیچ كەمتر نییە لە تاوانی تیرۆركردنەكەی.
ئێمە هەر لە سەرەتاشەوە لەگەڵ بەڕێز جێگری سەرۆكی حكومەتدا قسەمان كردووە و پشتیوانی تەواومان بۆ بەدواداچوون و دەستگیركردنی هەر كەس لایەنێك ئەم كارەی كردبێ، دەربڕیوە.
بۆیە جارێكیتریش كۆمەڵانی خەڵكیی دڵنیا ئەكەینەوە وەكو پێشتریش رامانگەیاندووە بەوپەڕی سەربەرزییەوە ئەچینە بەردەمی دادگا و پابەند ئەبین بە سەروەری یاسا و لەوێش بێتاوانی خۆمان ئەسەلمێنین، لەكاتێكدا هەموو تۆمەتبارێك بێتاوانە تاكو تۆمەتەكەی بە بەڵگەی یاسایی بەسەردا ئەسەپێنرێ.
ئێمە خەباتمان بۆ دامەزراندنی حوكمی یاسا و بەرز راگرتنی دەسەڵاتی دادوەری كرد.. بڕیاری ئامادەبوونیشمان لەبەردەمی دادگادا هەر لەوەوە سەرچاوەی گرتووە لەدوای گرتنەبەری رێوشوێنە یاساییەكان.
ئەو هەواڵە هەڵبەستراوانەش كە گوایە ئێمە بە قەرەباڵغی ئەچینە بەردەمی دادگا هیچ راستییەكی تێدا نییە و هەموو ئەو دەستانەش ئەناسین كە خەریكی ئەو جۆرە ورووژاندنەن، وەكو مافێكی سادەی خۆشمان لەبەرامبەر هەر هەوڵێكی چەواشەكارانەی بێ بەڵگە لەلایەن هەر كەس و لایەنێكەوە بێت لە دژی یەكێتی نیشتمانی كوردستان و خۆشمان، بێدەنگ نابین و هەموو رێوشوێنێكی یاسایی راست و رەوا ئەگرینەبەر.
هەركەسێكیش پێویستی بە بەدواداچوون هەیە دەتوانێ پەیوەندی بە تیمی پارێزەرانی تایبەت بەم كەیسەی ئێمەوە بكات تا وەڵامی راستی دەستبكەوێت.
داواش لە كەسوكاری شەهید كاوە گەرمیانی دەكەین كە بە عەقڵی خۆیان و بە قازانجی ئەو زیانەی لێیانكەوتووە كاربكەن نەك لەژێر كاریگەرێتی پلانی ئەو خەڵكانەی هیچ بەرژەوەندییەكیان نییە جگەلە تێكدان.
ئەمانەوێ ئەوەش روونبكەینەوە كە لە راگەیاندنەكاندا بڵاوكرایەوە گوایە ئێمە هیچ پلەیەكی سەربازیمان نییە، بەپێچەوانەوە ئێمە بە فەرمی خولی سەربازیمان بینیوە و بە فەرمانی فەرمیش پلەی (فەریق)مان وەرگرتووە، جگەلەوە بە فەرمی نوێنەری فەرماندەی گشتی (هـ.پ.ك) بووین و هەموو دەسەڵاتەكانی فەرماندەی گشتیمان هەبووە و لەهەموو كۆڕ و كۆبوونەوە سەربازی و پێشمەرگایەتییەكاندا بەشداریمانكردووە و ئەندامی تیمی یەكخستنەوەی ( هـ.پ.ك) بووین.
دەخوازم هەموو لایەك هەست بە بەرپرسیارێتی بكەن لە دەربڕین و بڵاوكردنەوەی زانیاری و خۆیان بەدووربگرن لە كاری پەلە و بێبنەما و ناوزڕاندن كە لە بەرژەوەندی كەسدا نییە تاكو كارەكانی دادگا و گەیشتنە ئەنجام بە رێكوپێكی بڕوات و هەموو لایەكمان مافی خۆی وەربگرێت، چونكە كەس سوود لە ئاڵۆزاندنی دۆخەكە وەرناگرێ.
مەحمود سەنگاوی
26/12/2013
