لەمیانی بەشداریكردنی لە بەرنامەیەكی
تایبەت لەگەڵ كەناڵی (رۆناهی) هەڤاڵ مەلا بەختیار لێپرسراوی دەستەی كارگێڕی
مەكتەبی سیاسی یەكێتیی نیشتمانیی كوردستان، رایگەیاند: سیاسەتی شۆڤێنی‌و
سەركوتكردنی گەڵ كورد لە 50 ساڵی رابردوو لەلایەن رژێمی سوریا سەركەوتوو
نەبووەو چیتر ناتوانرێت ئیرادەی گەلی كورد لە رۆژئاوا لەناو ببرێت.
وتیشی: ئێستا كورد لە رۆژئاوا ژمارەیەكی
قورسەو هێزو قورسایی خۆی هەیەو بووەتە واقعێك كە ناتوانرێت پشتگوێ بخرێت،
دەستكەوتی باشیش بەدەست هاتووە.
لەبارەی سیاسیەتی یەكێتی، بەرامبەر بە
رۆژئاوای كوردستان، هەڤاڵ مەلا بەختیار، وتی: یەكێتی هەر لەسەرەتاوە
سیاسەتی روون بووەوەو پشتیوانی تەواویی ئەو قەوارە سیاسەی كردووە كە لە
رۆژئاوای كوردستان دروست بووە.
راشیگەیاند: وەك یەكێتی تێبینی‌و رەخنەو تایبەتی خۆشمان لەسەر ئیرادەی رۆژئاوا هەیە.
سەبارەت بە چوونی ژمارەیەك گەنجی هەرێمی
كوردستان بۆ شەڕكردن لە ریزی گروپە توندڕەوەكان، هەڤاڵ مەلا بەختیار، وتی:
ئەو گەنجانەی روو لە سوریا دەكەن پەروەردەی جوندلئیسلام‌و ئەنسار ئیسلامن
كە لە رابردوو تاوانی زۆر گەورەیان لە كوردستان ئەنجامداوە.
روونیشیكردەوە: ئێمە خەفەت بۆ كەسوكاری ئەو گەنجانەش دەخۆین كەلە سوریا دەكوژرێن.
هەر لە بەرنامەكەدا، هەڤاڵ مەلا
بەختیار، وتی: لایەنە كوردییەكان بە یەكگرتوویی سەربەخۆیی گفتوگۆ لەگەڵ
ئۆپۆزسیۆنی سوریا بكەن‌و لە كۆنگرەی جنێف2 دا یەك هەڵوێست یەك وتاربن تاكو
مافی كورد لەو كۆنگرەیەدا بچەسپێت.
لەبارەی پرسی كورد لە توركیا، لێپرسراوی
دەستەی كارگێڕی مەكتەبی سیاسی یەكێتی، رایگەیاند: دەست پێكی گفتوگۆكان‌و
راگرتنی شەڕ لە توركیا بە دەست پێشخەری سەرۆك مام جەلال بووەو، ئەم
گفتوگۆیەشی ئێستا دەستی پێكردووە بەهەمان شێوە لەسەر دەستی سەرۆك مام جەلال
هاتووەتە كایەوە.
لەكۆتایی بەرنامەكەداو، لەسەر مەسەلەی
كەركوك، هەڤاڵ مەلا بەختیار، وتی: ماوەی 9 ساڵە ماددەی 140 جێبەجێ نەكراوە،
بۆیە پێویستە كورد ستراتیجی خۆی لەبارەی پرسی گەڕانەوەی كەركوك بۆ سەر
هەرێمی كوردستان بگۆڕێت‌و لەمەودوا هەوڵی دیاریكردنی سنور بدرێت‌و لە
گفتوگۆكانیشدا دادۆكی لەسەر جوگرافیای كەركوك بكەین.
وتیشی: ئێمە كە چوین بۆ گفتوگۆ بڵێین
ئەوە نەخشە، (كەركوك، خانەقین، مەندەلی، شەنگار، هەتا حەویجەو تەلەعفەر) لە
چوارچێوەی كوردستانە.
