نوێترین لێدوانی د.نه‌جمه‌دین له‌باره‌ی ته‌ندروستی سه‌رۆك تاڵه‌بانی

د.نه‌جمه‌دین كه‌ریم پزیشكی رێپێدراو بۆ لێدوان له‌باره‌ی ته‌ندروستی سه‌رۆك تاڵه‌بانی رایگه‌یاند: دۆخی ته‌ندروستی سه‌رۆك مام جه‌لال پێشكه‌وتنی به‌رچاوی به‌خۆیه‌وه‌ بینیوه‌و به‌ره‌و باشتریش ده‌چێت.

له‌په‌یامێكیدا بۆ دانیشتوانی پارێزگای كه‌ركوك د.نه‌جمه‌دین كه‌ریم پارێزگاری كه‌ركوك پیرۆزبایی ساڵی نوێی زاینی له‌دانیشتوانی پارێزگای كه‌ركوك به‌هه‌موو پێكهاته‌و نه‌ته‌وه‌كانیه‌وه‌ كردو هیوای خواست ساڵی 2014 ساڵی به‌دیهێنانی ئاواته‌كانی دانیشتوانی پارێزگای كه‌ركوك بێت.

له‌باره‌ی دۆخی ته‌ندروستی سه‌رۆك مام جه‌لال-یش د.نه‌جمه‌دین كه‌ریم پارێزگاری كه‌ركوك و پزیشكی رێگه‌پێدراو بۆ لێدوان له‌باره‌ی ته‌ندروستی سه‌رۆك تاڵه‌بانی رایگه‌یاند: دۆخی ته‌ندروستی سه‌رۆك مام جه‌لال پێشكه‌وتنی به‌رچاوی به‌خۆیه‌وه‌ بینیوه‌و به‌ره‌و باشتریش ده‌چێت.

د.نه‌جمه‌دین كه‌ریم راشیگه‌یاند: ساڵی 2013 لایه‌نه‌ سیاسیه‌كانی كه‌ركوك نه‌یانتوانیوه‌ هه‌ماهه‌نگیه‌كی باش دروستبكه‌ن و وتیشی: هیوادارین ساڵی 2014 ساڵی هه‌ماهه‌نگیكردنی نێوان لایه‌نه‌ سیاسیه‌كان بێت.

له‌لایه‌كی دیكه‌شه‌وه‌ د.نه‌جمه‌دین كه‌ریم پارێزگاری كه‌ركوك بۆ پیرۆزكردنی چه‌ژنه‌كانی سه‌ری ساڵ سه‌ردانی كڵێسای كه‌ركوكی كردو پیرۆزبایی سه‌رۆك مام جه‌لال-ی به‌مه‌سیحیه‌كان گه‌یاندو هیوای خواست ساڵی نوێ ساڵی به‌رقه‌راركردنی ئاسایش و ئۆقره‌یی بێت بۆ هه‌موو عیراقیه‌كان و له‌سایه‌یدا ئاوات و خولیاكانی مه‌سیحیه‌كان به‌دێت.

له‌به‌رامبه‌ردا قه‌شه‌ی كڵیساكانی شاری كه‌ركوك سوپاسی پارێزگاری كه‌ركوكیان كه‌هه‌میشه‌ به‌خه‌می برایه‌تی و پێكه‌وه‌ژیانه‌وه‌یه‌و راشیانگه‌یاند د.نه‌جمه‌دین كه‌ریم خزمه‌تێكی به‌رچاوی پێشكه‌شی كه‌ركوك كردوه‌ كه‌ له‌هیچ سه‌رده‌مێكدا ئه‌و خزمه‌ته‌ پێشكه‌شی كه‌ركوك نه‌كراوه‌.
مه‌سیحیه‌كانی كه‌ركوك په‌رۆشی خۆیان بۆ ته‌ندروستی سه‌رۆك مام جه‌لال ده‌ربڕی و هیوایان خواست سه‌رۆك مام جه‌لال به‌ته‌ندروستیه‌كی باشه‌وه‌ بۆ عیراق بگه‌رێته‌وه‌.

پۆلێن كردن هه‌واڵى كوردستانى