به‌رپرسی په‌یوه‌ندییه جه‌ماوه‌رییه‌كانی كۆمسیۆنی باڵای سه‌ربه‌خۆی
هه‌ڵبژاردنه‌كانی عیراق رایده‌گه‌یه‌نێت له دوای 19 ی ئه‌م مانگه‌وه
كارتی ئه‌لكترۆنی دابه‌شده‌كرێت به‌سه‌ر بنكه‌كانی ده‌نگداندا.عه‌بدولڕه‌حمان خه‌لیفه به‌رپرسی په‌یوه‌ندییه جه‌ماوه‌رییه‌كانی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق به PUKmedia ی راگه‌یاند: بڕیاره له 19 ی ئه‌م مانگه‌وه ده‌ستبكرێت به دابه‌شكردنی كارتی ئه‌لكترۆنی به‌سه‌ر بنكه‌كانی ده‌نگداندا له سه‌رتاسه‌ری عیراق، ئه‌م دابه‌شكردنه‌ش تا چه‌ند رۆژێك پێش ده‌نگدان به‌رده‌وام ده‌بێت.
وتیشی: ئه‌و كارته ئه‌لكترۆنیه به‌گشتی زانیاری ته‌واوی ئه‌و ده‌نگده‌ره له خۆ ده‌گرێت و ده‌نگده‌ر ده‌بێت له رۆژی ده‌نگداندا نیشانی كارمه‌ندانی كۆمسیۆنی بدات، واته به‌بێ ئه‌و كارته ده‌نگده‌ر ناتوانێت ده‌نگ بدات.
به‌رپرسی په‌یوه‌ندییه جه‌ماوه‌رییه‌كانی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق ئاماژه‌ی بۆ ئه‌وه‌شكرد: له دوای هه‌ڵبژاردنه‌كانی مانگی نیسانی داهاتوو، به‌دیاریكراوی له 1-6-2014 وه دیسان ناوه‌نده‌كانی ده‌نگدان ده‌كرێنه‌وه و ده‌نگده‌ر ده‌بێت بچێت سه‌ردانی ئه‌و ناوه‌ندانه بكات تا په‌نجه مۆرو وێنه له‌سه‌ر ئه‌و كارته ئه‌لكترۆنیانه دابنرێن.
راشیگه‌یاند: كارته‌كه به دوو قۆناغدا تێده‌په‌ڕێت قۆناغی یه‌كه‌م پێی ده‌ڵێن ئه‌لكترۆنی و قۆناغی دووه‌م پێی ده‌ڵین بایۆمیتری و به‌هه‌ردوو قۆناغه‌كه‌ش ده‌ڵێن كارتی زیره‌ك.
