ئەركەكانی ئێستامان لە نەورۆزو سەركەوتنی هەڵەبجەدا.نەورۆزی ئەمساڵ، گەرچی لە هەلومەرجی هێرشی تیرۆریستان‌و، ئاستەنگی ئابوری هەرێم دەگێڕین، بەڵام سەرەنجامی تێكۆشانی یەكێتی‌و لایەنەكانی ترو خەباتی مەدەنی خەڵكی هەڵەبجە، حكومەتی هەرێم وەڵامی بارودۆخە دژوارەكەی ناوچەكەو عیراقی، بە سوربون لەسەر مافەكانی گەلی كوردستانو خەڵكی دایەوەو هەڵەبجەی، وەكو چوارەمین پارێزگای كوردستان، كردە تاجەگوڵینەی نەتەوایەتی سەر ئارامگای شەهیدان‌و تێكڕای قوربانیانی دەڤەرەكە.
گەلی كۆڵنەدەری كوردستان!
بەدرێژایی مێژووی كۆن‌و نوێ، لەبەر عیشقی ئازادی‌و رزگاری، هەرگیز نەتەوەی كورد نەیهێشتووە مەشخەڵی جەژنی نەتەوایەتی نەورۆز، لە دەرون‌و دەستی وەچە جوامێرەكانی بكوژێنرێتەوە.
ئەم مەشخەڵە، هەمیشە روناكی بەرەنگاری بەخشیوەتە خەباتی رزگاری.
نەتەوەی كورد، نەك هەر گیانی بەرەنگاری، بەردەوام پاراستوەو پەرەپێداوە، بەڵكو لەوپەڕی رۆژگارە نەهامەتیەكانیشدا، ژیلەمۆی ناوبەناو تاوسەندوی خەباتی ئازادیخوازانەی دەروبەریش بووە، داگیركەرەكانیش، بۆ ئەوەی دەسەڵاتی ستەمكارانەیان بپارێزن‌و بسەپێنن، بەشێك لە ستراتیژیان پەلاماردانی كوردستان بووە، هەر بۆیە، لەسەدەكانی ناوەڕاستەوە، كەوتونەتە وێزەی میرنشینەكانی كوردستانو خاپوریان كردون. تاوانیان گەیاندە جەنگی چاڵدێران‌و رێكەوتنی عوسمانی‌و سەفەوی، هەروەها رێككەوتنەكانی ئەرزڕوم‌و هەردوو رێككەوتنامەی زەهاویش، دژی سەردارە سەروەریخوازەكانی كورد.
لەدوای جەنگی یەكەمی جیهان‌و رێككەوتنامەی سایكس پیكۆ، پەیمانی سنتۆ، ئاخریشیان رێكەوتنامەی جەزائیر، بەڵگەی درێژەی داگیركەرانی كوردستانن بەرامبەر نەتەوەی كورد.
لەبەرامبەردا كورد، نەك وەڵامی رقی بە رقی پێچەوانەوە نەداوەتەوە، بەڵكو بە سیاسەتی ئاشتیو خەباتی بەدیهێنانی ئامانجە هاوبەشەكان وەڵامی داوەتەوە. گەرچی ئاشتیخوازی كورد، بەرامبەر سیاسەتی دوژمنایەتی، لەلایەن هێزە باڵادەستەكانی نەتەوە سەردەستەكانەوە، هەتا داگیركردنی كوێتو كۆتایی جەنگی سارد، نەك پێینەزانراوە، بەڵكو ناسیۆنالیستە گۆشەگیرو سەلەفیەكان، وەكو تەواوكەری سیاسەتی داگیركەران، شۆڤیەنیەتیان كردۆتە بەشێكی باوەڕی رای گشتی، كە ئاسەوارەكەی هەتائێستاش لە میدیای عەرەبی‌و فارسی‌و توركیدا، ماوە.
مەشخەڵ بەدەستانی نەورۆز!
گەلەكەمان گەلێكی لەخۆبوردووە، بۆیە، لەشۆڕشدا دیل رێزی لێگیراوەو لەراپەڕینیشدا، دیل، خزمەت كران.
ئەمە جگەلەوەی تەواوی هێزە ئۆپۆزسیۆنەكانی عیراق، بەسەر بەردەبازی پێشمەرگەو ئەزمونی حوكمڕانی كوردستانەوە، پەڕینەوە بۆ بەغدادو لەعێراقی نوێشدا، پاڵپشتی هێزەكانی كوردستان، كاریگەر بوو، هێزەكان شوێنی شیاوی حوكمڕانییان دەستكەوت.
چەندین جار لەجەنگی ئەهلی، بەهۆی سیاسەتی دووربینانەی سەركردایەتی سیاسی كوردەوە، لەسەروی هەموشیانەوە، سەرۆك مام جەلال، عیراق دەرباز دەكرا.
بەداخەوە، لەعیراقدا، نە دەرس لە مێژووی خوێناوی كۆن، وەكو پێویست وەرگیراوە، نە خزمەتە بەردەوامەكانی مێژووی نوێی كورد، لەبەرچاوگیراوە.
لەكاتێكدا ئەم راستییە تاڵانە بیردەخەینەوە، بێگومان، هەڵوێستی هێزە چەپ‌و هەتاڕادەیەكیش دیموكراتخوازانی عیراق‌و ناوچەكە لەچلەكانەوە، لەپشتیوانیكردنی كوردستان.
هەروەها، هەڵوێستی خوالێخۆشبوو سەماحەتی (سەید موحسین حەكیم) وەكو نەخشی مێژوو، كە تەحریمی شەڕی لەكوردستاندا لەشۆڕشی ئەیلولدا كرد، قەت فەرامۆش ناكەین. كە هەتا ئێستاش لەناو شیعەدا كاریگەری هەیە.
ئەم هەڵوێستانە لەویژدانی گەلەكەماندا چەسپیون، بەڵام مەترسیمان لە وڵاتانی ناوچەكەداو لە بەشەكانی كوردستاندا، نەبونی دیموكراسی‌و چارەسەرنەكردنی كێشە لەمێژینەكانە، كە سەرەنجامی ئەو بارودۆخە لەمێژینەیەشە، ناوچەكە كەوتەوە ناو گێژاوی جۆراوجۆرەوە، بێ ئەوەی هەتائێستاش، ئاسۆیەكی ساماڵ لە بەدیهێنانی دیموكراسی دەركەوتبێ. نزیكترین نمونەش رابونی رۆژئاوای كوردستانو دەسەڵاتی خۆبەرێوەبردنیانە، كە لەبری پشتیوانیكردنیان لەلایەن ئۆپۆزسیۆنی سوریاوە، كە خۆیان دوچاری شەڕی ئەهلی بون، دوژمنایەتی دەكرێن. تەنانەت لەعیراقیشدا، سەرەڕای روخاندنی رژێمی سەدام‌و سەلماندنی دەستوری گەل پەسەندیش.
بەردەوام كێشەی چارەسەرنەكراو، لەسەر كێشەی تازەسەرهەڵداو، كەڵەكە دەكرێن‌و دۆخەكە خزێندراوەتە ئەگەری دۆخێكی مەترسیدارتر!
هاووڵاتی ئازیز!
یەكێتیی نیشتمانیی كوردستان، راپەڕاندنی ئەركە بنچینەییەكانی دیموكراسی، لەناو پرۆسەیەكی مێژووییدا دەبینێ. ئەم ئەركانەش، بەئارەزوی هیچ كەسێكو لایەك دەسكەنە ناكرێ. پابەندبوون بەدەستورو سیاسەتی بەدیهێنانی ئەرك بەئەركی ئەركەكانی دیموكراسی‌و سازانی نیشتمانی، دەبوایە بەكردەوە رەنگی راستەقینەی بدایەتەوە. كەچی بەپێچەوانەوە، چارەسەرنەكردنی كێشەكان، لە مەترسییە ترسناكەكانی دۆخی ئێستان.
ئۆباڵی ئەم دۆخەش، جگە لە حكومەتی عیراق، دەكەوێتە ئەستۆی هەندێك لە هێزە سیاسیەكانی بەناو بەرهەڵستكاریش، كە بەهەڵوێستی هەڵەو سیاسەتی كاردانەوەو رقەبەرایەتی، دۆخەكەیان لەگرێژنە دەركردووە!
لەكوردستانیشدا، گەلەكەمان، نیگەرانی بەرامبەر حكومەتەكانی عێراق‌و زۆربەی ئۆپۆزسیۆنیش هەبووەو هەیە.
سەبارەت بەوەی:
- هەشت ساڵ بەسەر پەسەندكردنی دەستورو جێگیركردنی مادەی (140) تێدەپەڕێ، كەچی كابینە پێكهێنراوەكان لەو ساڵانەدا، هەنگاوی بنەڕەتیان بۆ جێبەجێكردنی بڕگەكانی مادەی (140) نەناوە.
- زۆربەی ئۆپۆزسیۆن، بەتایبەتی ئەوانەی لەناو (العراقیە) دا كۆبونەتەوە، هاوشانی رەوت‌و هێزی مەزهەبی تریش، نەك پشتیوانی كورد بۆ گێڕانەوەی ناوچە دابڕێندراوەكانی دەرەوەی هەرێم ناكەن، بەڵكو لەناو ئەماندا، سیاسەتی شۆڤێنی مەترسیدارتر سەبارەت بە كەركوك‌و خانەقین‌و ژەنگار، پەیڕەودەكرێ.
- پرسی نەوت، ساڵەهایە بە چارەسەرنەكراوی هێڵراوەتەوە، بەڵكو كێشەی بودجەو موچەو مافە مەدەنیەكانی كوردستانیشی خرایەسەر!
- چارەسەرنەكردنی ئەو كێشانە، كەلێنی سیاسی، ئابوری، كۆمەڵایەتی‌و ئەمنیەكانی لەعێراق‌و لەنێوان بەغدادو هەرێمدا، فراوانتر كردووە، ئەمەش، مەترسییە گەورەكانی ناوچەكەشی، پەلكێش كردە ناوەڕاست‌و خوارووی عێراق. ناوبەناو تیرۆریستەكان كنەی ئەنجامدانی تاوان لەكوردستانیشدا دەكەن.
- بەپارێزگاكردنی هەڵەبجە، كە هەموو لایەك فرمێسكی بۆ دەڕێژن، مەخابن، دوای ئەوەی حكومەتی عیراق پەسەندی كرد، دەیان گیروگازی لەپەرلەمانی عیراقدا، بۆ قوتدەكەنەوە.
- ئەو بارودۆخەی عێراق‌و چارەسەرنەكردنی كێشەكانی نێوان بەغدادو هەرێم، ئێمە بەقوڵی دەترسێنێ، بەتایبەتی لە نەبونی سیاسەتی لێبڕاوی چارەسەركردنی كێشەكان‌و هێرشی تیرۆریستەكان‌و لێكترازانی هێزە سیاسیەكان لەناو خۆیاندا، كاریگەری نالەباری لەسەر پرۆسەی هەڵبژاردنیش دەبێ‌و هێزەكانی دەسەڵات‌و دژە دەسەڵات، دەخاتە ناو ململانێی ناتەندروستی هەڵبژاردنەوە!
گەلی كوردستان!
خەڵكی هەڵەبجە!
مەكتەبی سیاسی یەكێتیەكەتان، لەكاتێكدا جارێكی تر پیرۆزبایی گەرمتان، بەبۆنەی جەژنی نەتەوەیی نەورۆزو هاتنەوەی بەهار لێدەكات، لەناخەوە، پیرۆزبایی ئەم سەركەوتنە لە سەراپا دانیشتوانی هەڵەبجەو ناوچەكەو نەتەوەكەشمان، بەبۆنەی بەپارێزگابونی هەڵەبجەوە دەكات. دڵنیاشین، لەمەودوا، پەرلەمانی كوردستانو حكومەتی هەرێم، توانایان دەخەنەكار، هەتا پێویستیەكانی پارێزگایەكی نوێ، لە هەڵەبجەی نوێخوازدا، لە ژێرخان‌و سەرخانی پارێزگاكەدا، بێننەی. هەر ئەمەش ببێتە سەرەتای سیاسەتی شێلگیرتر بۆ قەرەبووكردنەوەی قوربانیانی هەڵەبجەو تەواوی ناوچە كیمیابارانكراوەكان‌و ئەنفالكراوانیش.
یەكێتی، وەكو هەمیشە، دوپاتیدەكاتەوە، ئەركی سەرشانی لە كابینەی هەشتەمو لەناو پەرلەماندا، بۆ بەدیهێنانی پارێزگایەكی هاوچەرخ، بەدیدێنێ. لەسەر ئاستی عێراقیشدا، یەكێتیەكان، دەبنە جەنگاوەری یاسایی‌و ئیداری‌و ئاوەدانی .. دڵنیاشین، ئیرادەی گەلەكەمان‌و خەڵكی هەڵەبجەی شەهیدگای كوردستان، بەسەر كێشەكاندا، سەردەكەون.
دیسان پیرۆزبێ دوو جەژنەی كوردستان، نەورۆزی دێرینەو هەڵەبجەی پارێزگای بەرەو مۆدێرنە.
هەر سەركەوتوو بێ .. ئیرادەی دیموكراسی‌و دادپەروەری.
مەكتەبی سیاسی
یەكێتیی نیشتمانیی كوردستان
2014/3/20
