پەیامی ئۆجەلان بۆ سەرۆك تاڵەبانی و بارزانی

عەبدوڵڵا ئۆجەلان سەرۆكی دەستگیركراوی پەكەكە پەیامێكی بۆ سەرۆك تاڵەبانی و مەسعود بارزانی ناردوەو وێڕای دەربڕٍینی خۆشحاڵی خۆی بۆ باشبونی تەندروستی سەرۆك مام جەلال داواش دەكات لەدوای ئەو گۆڕانكاریانەی ئەمدوایە بەزوترین كات كۆنگرەی نەتەوەی ببەسترێت.

دوێنێ سڕی سورەیا ئۆندەر پەرلەمانتاری ئەستەنبوڵی پارتی دیموكراتی گەلان (HDP)و لەیلا زانا پەرلەمانتاری سەربەخۆی ئامەد سەردانی دورگەی ئیمرالیان كردو بۆ ماوەی سێ سەعات و 30 خولەك لەگەڵ عەبدوڵڵا ئۆجەلان سەرۆكی دەستگیركراوی پەكەكە كۆبوونەوەو دوای گەڕانەوەشیان پەیامێكی ئۆجەلانیان بڵاوكرده‌وه‌.

ئۆجەلان لەسەرەتای پەیامەكەیدا بۆ سەرۆك مام جەلال و مەسعود بارزانی، لەبارەی تەندروستی سەرۆك تاڵەبانیەوە وتویەتی: بیستم بارودۆخی تەندروستی بەڕێزتان بەرەو باشی دەچێت، بۆیە زۆر خۆشحاڵ بووم.

ئەوەشی نوسیوە: لەسەر ئەو گۆڕاناكارییانەی ئەم دوایەو پێویستیە بەپەلە بۆ بەستنی گۆنگرەی نەتەوەیی و یەكێتی نەتەوەیی، پێویستە ئەم بابەتە لەكاتێكی زوودا جێبەجێبكرێت.

ئۆجەلان لەبەشێكی تری ئەو پەیامەیدا لەبارەی پرۆسەی چارەسەری ئاشتی لەتوركیا رایگەیاندوە: ئەو ئیرادەیەی كە بە پرۆسەی نەورۆزی ساڵی ٢٠١٣ نیشانماندا   لەگەڵ هەموو سستیەكەی و مەیلی خۆسەپاندنی یەكلایەنە بەبەهێزی بەردەوامە، دەبێ لەیادیش نەكرێ كە لەكۆتایی ئەم پرۆسەیەدا  ئەوەی دەستكەوتی دەبێ ئەوە هەموو خەڵكە.

پۆلێن كردن هه‌واڵى كوردستانى