لەپاش دروستبوونی ڕێكخراوی تیرۆریستی داعش داگیركردنی بەشێكی زۆری وڵاتی سوریا و پاشان هێرش كردنە سەر چەند ناوچەیەكی وڵاتی عێراق و داگیركردنی هەندێ ناوچەی گرنگ و ئەنجامدانی چەندین تاوانی كوشتن و ئەشكەنجەدانی سەدان كەسی بێتاوان و دەربەدەركردنی هەزاران خەڵك و ڕفاندنی سەدان ژن و منداڵ و خوێندكاری بێتاوان و دروستكردنی چەندین جۆرە ترس و تۆقاندن لە دڵی هەموو چین و توێژەكانی كۆمەڵگای عێراقدا بەبێگوێدانە هیچ بەهایەكی مرۆڤایەتی و ئاین و ڕەگەز ...لە پاش چەند رۆژێك لە گیرسانەوە و مانەوەیان لەوناوچانەی كە عەرەبنشینن ، دواتر بە بەرنامە هێرشیان كردە سەر سنووری كوردستان و هەر بەو بۆنەشەوە هێزەكانی پێشمەرگە بەدرێژای زیاتر لە ( 1050 ) كم كەوتە بەرگری كردن لە خاكی پیرۆزی كوردستان و ڕوبەڕووبوونەوەیان دواتر ئەو دەرئەنجامەی لێكەوتەوە كە ڕێكخراوی تیرۆریستی داعش توشی شكست و تێشكان بێت لە هەندێ ناوچەی كوردستان بەتایبەت ناوچەكانی جەلەولا و سەعدیە و چەندین دێهاتی سنووری قەرەتەپە تا گەیشت بە حەمرین و دواتر توانرا بە هەوڵ و هێمەتی هێزەكانی پێشمەرگە ئاڵای پیرۆزی كوردستان لەسەر چیای حەمرین دابنرێت.
هەر بەو بۆنەیەوە پیرۆزبای لەسەرجەم هاونیشتیمانیان بەگشتی و خەڵكی سنووری گەرمیان و گەرمەسێر بەتایبەتی دەكەین و دەستخۆشی لە هێزی پێشمەرگە و هێزەكانی ناوخۆ دەكەین بۆ ئەو قارەمانیەتی و نەبەردیانەی ئەنجامیان دا لەئازادكردنی ئەو ناوچانەدا..
هەروەها پێویستە سەری ڕێز و وەفا بۆ سەرجەم شەهیدانی كوردستان دابنوێنین و ئەو سەركەوتنە گەورەیە لەكەسوكاریان پیرۆز بكەین و هیوای چاكبوونەوە بۆ بریندارەكان دەخوازین هەروەها لەسەركەوتنێكی وەها گەورەدا پێویستە سوپاسی سەرجەم خەڵكی گەرمیان بكەین كە توانیان پاڵپشتێكی ماددی و مەعنەوی هێزەكانی پێشمەرگە بكەن كە هاوكاری هێزەكانی پێشمەرگەیان كردووە .
ئێمە لە دێرزەمانەوە وتوومانە ئەو ناوچانە دەبێ لە شۆڤینییەكان و ئەوانەی ئازاری خەڵكیان داوە پاكبكرێتەوەو ئێستایش سورین لەسەر ئەوە كە دەسەڵاتی ئەو ناوچانە بەهێزەكانی ئاسایش و پۆلیس و هێزە نیشتمانییەكان بسپێردرێت ، دووپاتی دەكەینەوە كە ئەو كەس و لایەنانەی ئازاری خەڵكی ناوچەكەیان داوە و دەستیان هەبووە لەتێكدانی ئارامی و ناوچەكەدا ڕادەستی دادگا بكرێن و بەسزای یاسای خۆیان بگەن ئەوەی لێرەدا پێویستە یەكڕیزی یەك دەنگی لەنێوان سەرجەم لایەنە كوردیەكاندا باشتر بەدی بێت بۆ ئەوەی سەرجەم ئاواتەكانی شەهیدان بەدیبێنن و هەوڵەكانمان زیاتر چڕ بكەینەوە لەپێناو جێبەجێكردنی دەستوور و ماددەی (140) و گەڕانەوەی ناوچە دابڕێنراوەكان بۆ سەر خاكی پیرۆزی كوردستان .
لەكۆتایدا دووبارە سەری ڕێز و نەوازش بۆ سەرجەم شەهیدان بەگشتی و شەهیدانی دەستی تیرۆر بەتایبەت دادەنوێنین و جەخت دەكەینەوە كە دەبێت هەموو لایەك ئەوە بزانین كە ئازایەتی و قارەمانێتی و نیشتیمان پەروەری هێزەكانی پێشمەرگە نەبوایە ، نەك جەلەولا و سەعدیە و ناوچەكانی تر ئازاد نەدەكران بەڵكو ڕێكخراوی تیرۆریستی داعش مەترسی دروست دەكرد لەسەر ناوچەكانی كوردستان بەگشتی و گەرمیان گەرمەسێر بەتایبەتی .
مەڵبەندی "11"ی ڕێكخستنی گەرمیانی ( ی.ن.ك)
